Berisha përmes një postimi në Facebook, ka shpërndarë disa dokumente duke i cilësuar ato si versioni origjinal.
“Hysen Durmishi ky është versioni origjinal”, ka shkruar Berisha.
Gjatë një konference për media pasditen e së premtes, Berisha ftoi Prokurorinë e Shtetit të nisë hetimet për katër kontrata kornizë të nënshkruara nga Ministria e Infrastrukturës për siç thuhet mirëmbajtje të autostradave, në këtë rast për autostradat “Arbën Xhaferi” dhe “Ibrahim Rugova”.
Ai ka thënë se vlera e këtyre kontratave të dyshimta për korrupsion është mbi 400 mijë euro, të nënshkruara nga zëvendësministri Hysen Durmishi dhe nga zyrtari përgjegjës i prokurimit në Ministri të Infrastrukturës, Nexhat Krasniqi.
Zëvendësministri i Infrastrukturës, Hysen Durmishi ka reaguar duke mohuar këto akuza duke thënë se kontratat që ka përmendur Berisha kanë vlerën e 12 milionë eurove.
“Ja kish dhënë dikush do letra Bekë Berishës e ky i shkreti nuk dinte as t’i lexoj. Nuk i kam nënshkruar katër kontrata në vlerë rreth 400 mijë euro o Bekë Berisha sepse me ligj zv.ministri nuk nënshkruan kontrata nën vlerën 500 mijë euro. Ato katër kontrata që po i përmend ti e kanë vlerën 12 milionë euro”, ka shkruar ai në Facebook.
