Deputeti i Partisë Demokratike të Kosovës, Artan Behrami, ka vlerësuar se marshi i sotëm “Drejtësi, jo politikë”, i organizuar në mbështetje të ish-krerëve të Ushtria Çlirimtare e Kosovës (UÇK) që po gjykohen në Hagë, u përcolli atyre mesazhin se nuk janë vetëm dhe se pas tyre qëndrojnë populli, historia dhe e vërteta.
Në emisionin “Ditari” në Tëvë1, Behrami ka theksuar se qytetarët e Kosovës kërkuan që verdikti ndaj ish-krerëve të UÇK-së të jetë i drejtë dhe lirues.
“Kjo ishte ndër marshat me pjesëmarrjen më masive që është organizuar ndonjëherë në Republikën e Kosovës. Sot në shesh kishte fëmijë, të rinj, gra e pleq nga të gjitha trojet me të vetmin mesazh që epilogu i gjykimit kundër krerëve të UÇK-së të jetë i bazuar në drejtësi dhe jo në politikë. Ishte gjithashtu një mesazh për t’u treguar atyre se nuk janë vetëm, se popullin e kanë pas, se historia është pas dhe se e vërteta është pas”, ka deklaruar ai.
Sipas Behramit, marshin e bëri edhe më madhështor përbashkimi i përfaqësuesve politikë, pavarësisht bindjeve partiake.
“Pjesëmarrja e qytetarëve ka qenë më e rëndësishme sesa ajo e politikanëve, megjithatë sot ky marsh i përbashkoi edhe përfaqësuesit politikë. Për herë të parë pas shumë vitesh, jo vetëm qielli, por edhe ky marsh për drejtësi i bashkoi shqiptarët. Kjo e bëri edhe më të fuqishëm simbolikisht. Populli dhe politika e kanë dhënë epilogun e tyre lirues për krerët e UÇK-së dhe të njëjtin e presim edhe nga Haga”, ka përfunduar Behrami.
Ndryshe, dhjetëra mijëra njerëz morën pjesë në marshin e organizuar të martën në Prishtinë, në mbështetje të ish-eprorëve të Ushtrisë Çlirimtare të Kosovës (UÇK) që po gjykohen në Gjykatën Speciale në Hagë.
Marshi u mbajt në përvjetorin e 18-të të pavarësisë së Kosovës.
Organizatorët përsëritën se thirrjet për drejtësi nuk janë kundër askujt, por për “dinjitetin kolektiv” të popullit të Kosovës./teve1.info/
