Kandidati për deputet nga radhët e PDK-së, Artan Behrami, ka bërë të ditur se ka marrë konfirmim nga zyra e kongresmenit amerikan, Keith Self, se kërkesa e tij për të hetuar Jack Smith është dërguar në Departamentin Ligjor të Kongresit.
Sipas Behramit, tashmë kërkesa e tij veçse pritet të shqyrtohet.
“Mbrëmë kam marrë konfirmimin nga zyra e kongresmenit amerikan, Keith Self, se kërkesa ime për të hetuar Jack Smith është derguar në Departamentin Ligjor të Kongresit, ku pritet të shqyrtohet!”, ka shkruar ai në Facebook.
Tutje, ai ka thënë se ky është vetëm fillimi i iniciativës, pasi që brenda Kuvendit do t’i adresojë të gjitha “padrejtësitë e katër vjetëve të fundit të Gjykatës Speciale “.
Behrami, përmes letrës që e dërgoi më 31 janar ka kërkuar që kongresmeni Self të nisë një hetim mbi rolin e Jack Smith në parandalimin e samitit në Shtëpinë e Bardhë në vitin 2020, dhe mbi shpërbërjen e procesit të paqes.
Behrami pati thënë se pas publikimit të një aktakuze të pakonfirmuar nga Jack Smith, ishte anuluar takimi i presidentit Thaçi me presidentin Trump në Shtëpinë e Bardhë./teve1.info/
