Deputeti i Partisë Demokratike të Kosovës, Artan Behrami, ka kritikuar ashpër Gjykatën Speciale dhe kryetaren e saj, Ekaterina Trendafilova, gjatë fjalimit në Kuvendin e Kosovës.
Behrami ka thënë se Gjykata Speciale, në bashkëpunim me Bashkimin Evropian, po e trajton Kuvendin e Kosovës si “nënë surrogate”, ndërsa sipas tij, institucionet ndërkombëtare si EULEX, UNMIK dhe Rezoluta 1244 po konsiderohen si “prindër ligjorë” të saj.
“Që nga themelimi i Dhomave të Specializuara të Republikës së Kosovës, ky është komunikimi i parë i kësaj gjykate me ne… Gjykata Speciale është duke bërë një devijim të tmerrshëm të mandatit që ia ka dhënë ky Kuvend,” ka deklaruar Behrami.
Ai ka shtuar se Kuvendi ka pranuar një letër, siç e cilësoi ai, “të thatë dhe mospërfillëse” nga kryetarja e Gjykatës Speciale, pas rezolutës që ngrinte shqetësime për të drejtat e ish-krerëve të UÇK-së që po mbahen në Hagë.
Behrami ka kërkuar që Trendafilova të ftohet në Kuvend për sqarime, duke kërkuar mbështetjen e të gjitha grupeve parlamentare.
Ai gjithashtu ka përmendur qëndrimet e zyrtarëve shtetërorë në forume ndërkombëtare, duke theksuar se, sipas tij, edhe Kuvendi duhet të ndjekë të njëjtin qëndrim aktiv.
“Kur ministri e ka ngritur këtë çështje në instancat më të larta, Kuvendi nuk duhet të heshtë,” është shprehur ai, duke kërkuar gjithashtu që të ndalohen raportimet përmes EULEX-it dhe të kërkohet raportim i drejtpërdrejtë në Kuvend.
