Nga shkolla te Bundesliga – mesfushori kosovar po shkëlqen me St. Gallen dhe synon kthimin te gjiganti bavarez.
Në ndeshjen e tij të parë zyrtare me FC St. Gallen, Behar Neziri (22 vjeç) dha një paraqitje të jashtëzakonshme: udhëhoqi skuadrën drejt fitores 2:1 ndaj FC Basel në nisjen e sezonit dhe neutralizoi një nga legjendat e futbollit zviceran, Xherdan Shaqirin.
Me prejardhje kosovare si Shaqiri, por me pasaportë gjermane, Neziri është një nga prurjet më interesante të kampionatit zviceran. Ai ka qenë pjesë e akademisë së Bayern Munich, ku ka luajtur krah për krah me superyllin Jamal Musiala .
Në verën e vitit 2023, Neziri mori një vendim të pazakontë për një talent të rritur te Bayern: refuzoi rinovimin e kontratës dhe zgjodhi të transferohet te St. Gallen. Arsyeja? Kërkonte më shumë minuta në fushë dhe një ambient ku mund të rritej më shpejt si futbollist profesionist.
“Bayerni më ofroi rinovim, por unë doja të bëja hapin drejt St. Gallen. Infrastruktura është po aq profesionale. Po, në vend të tre pajisjeve në palestër ka vetëm një, por për t’u stërvitur mjafton”, shprehet Neziri me bindje.
Deri tani, vendimi duket se po jep fryte: Neziri ka qenë titullar në të gjitha ndeshjet e sezonit, dhe është shndërruar në një figurë qendrore në mesin e fushës për skuadrën e Enrico Maassen, i cili e përshkruan atë si “një lojtar që e kupton lojën si tërësi dhe mendon përtej fushës”.
Pavarësisht se sot shkëlqen në Superligën zvicerane, Behar Neziri nuk e ka humbur ambicien. Ai e thotë hapur se ëndërron rikthimin te skuadra e parë e Bayern Munich.
“Kam luajtur me Musiala, me Pavloviç në dyshen e mesfushës… pse jo, mund ta imagjinoj edhe një herë atë partneritet në të ardhmen”, thekson ai.
Në fund të nëntorit, St. Gallen do të përballet sërish me FC Basel. Dhe Neziri ka një qëllim të vogël personal për atë mbrëmje: të sigurojë një fanellë nga idhulli i tij, Xherdan Shaqiri. Pas paraqitjes së parë ku e dominoi duelin mes tyre, fanella e Shaqirit do të kishte një domethënie të veçantë për të.
