Gazetari, Besian Beha, ka komentuar në emisionin “Info Nata” nismën e PDK-së për ndryshimin e Ligjit për Dhomat e Specializuara të Kosovës, të cilën kjo parti e ka dërguar në Kuvend.
Pas kësaj nisme ka pasur reagime edhe nga Lëvizja Vetëvendosje, nga ku është kërkuar që të pritet vendimi i Gjykatës Kushtetuese lidhur me çështjen. Ndërkohë, deputetja e PDK-së, Vlora Çitaku, ka deklaruar se partia e saj është e gatshme ta tërheqë lëndën nga Kushtetuesja, në mënyrë që të procedohet ndryshimi i ligjit.
Duke komentuar zhvillimet, Beha ka thënë se partitë politike duhet t’i lënë anash përplasjet politike dhe të ulen së bashku për të diskutuar këtë çështje.
“Ky është gabim në skenën politike. Çdokush mundohet vetëm t’ia hedhë njëri-tjetrit dhe gabimi është që tentojnë t’i drejtojnë akuza njëri-tjetrit. Për shembull, kanë kaluar pesë ditë dhe nuk e kemi parë një takim të përbashkët të të gjitha partive. Z. Hamza i ka takuar veçmas partitë politike, ndërkohë që është dashur të takohen të gjithë bashkë dhe t’i dëgjojnë këshillat dhe kritikat që secili i ka për këtë proces”, ka thënë Beha.
Sipas tij, përplasjet ndërmjet partive po e vështirësojnë adresimin e çështjeve që lidhen me Gjykatën Speciale.
“Përderisa partitë politike në Kosovë e kanë si synim vetëm se si ta luftojnë njëri-tjetrin politikisht dhe si t’i marrin disa vota, unë nuk besoj që edhe ky problem ka me u adresu në formën e duhur. Normalisht, PDK-ja, si parti që ka dy ish-udhëheqës në këtë proces në Gjykatën Speciale në Hagë, edhe duhet të jetë më e zëshme, mirëpo me gjitha këto, ky është një proces që e prek jo vetëm një parti politike, por e prek UÇK-në, ushtrinë tonë, siç e themi në popull, e cila ka arritur ta çlirojë vendin tonë bashkë me NATO-n dhe partnerët e tjerë”, është shprehur Beha.
Beha ka theksuar se në një çështje të tillë, sipas tij, interesat politike dhe përplasjet partiake nuk duhet të jenë në plan të parë.
“Nuk duhet t’i vendosim inatet politike në rend të parë. Inatet politike duhet të harrohen në kësi momente dhe të merren vesh për çështjen e tyre. Sepse, nëse nuk harrohen as tash, nuk e di nëse ka ndonjë proces tjetër që do t’i bënte partitë politike t’i harronin inatet”, ka deklaruar Beha.
