Presidenti i Shqipërisë Bajram Begaj priti sot në takim komandantin e KFOR-it gjeneralmajor Ozkan Ulutash, me të cilin ka biseduar mbi rëndësinë e misionit të NATO-s për stabilitetin në rajon dhe thellimin e bashkëpunimit me Kosovën.
Kreu i shtetit shqiptar i shprehu mirënjohje gjeneral Ulutaş për marrjen e drejtimit të KFOR-it nga Turqia për herë të dytë dhe vlerësoi lart kontributin dhe angazhimin e trupave turke brenda misionit. Gjatë bisedimeve, presidenti Begaj theksoi rolin qendror të KFOR-it, raporton RTSH, përcjell KosovaPress.
“KFOR-i është shumë i rëndësishëm për paqen dhe stabilitetin jo vetëm në Kosovë, por edhe në gjithë rajonin,” u shpreh Begaj.
Në këtë kontekst, ai riafirmoi bindjen e tij se thellimi i bashkëpunimit ndërmjet vendeve të rajonit mbetet “faktor thelbësor” për sigurinë e përbashkët.
Një temë e veçantë në bisedë ishte mbështetja e vazhdueshme e Shqipërisë për forcimin e kapaciteteve të Kosovës.
Presidenti Begaj inkurajoi intensifikimin e bashkëpunimit mes KFOR-it dhe institucioneve të Kosovës, veçanërisht në drejtim të zhvillimit, modernizimit dhe transformimit të Forcës së Sigurisë së Kosovës në përputhje me standardet e NATO-s.
Gjithashtu, u vlerësua angazhimi i KFOR-it për garantimin e një situate të qetë sigurie dhe lirisë së lëvizjes, sidomos në zonat e Veriut të Kosovës. Presidenti Begaj konfirmoi angazhimin e palëkundur dhe mbështetjen e Shqipërisë për misionin KFOR, si një garanci thelbësore të sigurisë euro-atlantike në Ballkanin Perëndimor.
