Presidenti i Shqipërisë, Bajram Begaj në senacën solemne të Kuvendit ka uruar qytetarët e Kosovës për pavarësinë e vendit.
Begaj tha se Pavarësia ishte drejtësia shekullore që komuniteti ndërkombëtar i detyrohej shqiptarëve.
“Kam kënaqësinë të jem sot mes jush në këtë ditë të shënuar për kombin shqiptar jemi një komb që ka përballuar me dinjitet historinë e vështirë të rajonit pavarësisht se i ndarë prej kufijsh. Pavarësia ishte drejtësia shekullore që komuniteti ndërkombëtar i detyrohej shqiptarëve. Dita e pavarsisë na kujton forcën e qëndresës së popullit shqiptar, është ditë krenarie por edhe mirënjohje dhe falënderim për Shtetet e Bashkuara të Amerikës, Bashkimit Europian dhe gjithë shteteve tjera që iu gjindën afër popullit shqiptar me forcën ushtarake diplomatike dhe humanitare”, tha ai.
I pari i Shqipërisë ka kujtuar komandantin legjendar, Adem Jashari, luftën e UÇK-së, dhe presidentin historik të Kosovës, Ibrahim Rugova.
“U jemi falënderues shteteve mike që njohën pavarësinë e Kosovës. Me mirënjohje kujtojmë Adem Jasharin, UÇK-në, luftëtarët e lirisë që edhe sot na frymëzojnë me sakrificën e tyre për ta mbrojtur të ardhmen e një populli. Kujtojmë sot liderin simbol të forcës së durimit shqiptarin që me qartësinë dhe qetësinë e pashembullt qoi përpara kauzën e drejtë të pavarësisë së Kosovës në kohë shpërbërje marramendëse të shteteve e regjimeve kujtojmë presidentin Rugova simbol i paqes në Ballkan dhe në Europë”, tha ai.
Begaj tha se Shqipëria është mbështetëse e integrimit euroatlantik të Kosovës, teksa theksoi se Shqipëria mbështet dialogun mes Kosovës dhe Serbisë, për të cilin ai tha se duhet të përmbyllet me njohje reciproke mes të dyja vendeve.
“Dua ti falënderoj e inkurajoj nismat mbledhjet e përbashkëta të Qeverive në shërbim të lehtësimit të lidhjeve tona në të gjitha nivelet të cilat te president i Shqipërisë do të gjejnë mbështetje dhe bashkëpunim. Shqipëria është mbështetese e integrimit euroatlantik të Kosovës pikë së pari, e finalizimit të heqjes së vizave për qytetarët e Kosovës. Shqipëria është pranë jush edhe për pranimin e Kosovës në NATO në OKB dhe në të gjitha organizatat ndërkombëtare. Shqipëria mbështet dialogun Serbi – Kosovë. Kosova është shtet i lirë e i pavarur sido të mendojë apo veprojë zyrtarisht Serbia, qeveria serbe nuk është distancuar nga agresioni dhe as nuk ka ndaluar aktivitetin e saj kundër njohjes së Republikës së Kosovës. E kam të rëndësishme ta përshëndes angazhimin dhe vijimin e një dialogu të mirëndërtuar me njohje të ndërsjelltë”, tha tutje Begaj./teve1.info./
