Presidenti i Shqipërisë, Bajram Begaj, ka uruar kryeministrin në detyrë Albin Kurti për rezultatin e arritur në zgjedhjet parlamentare në Kosovë.
Ai u ka bërë thirrje forcave politike që të angazhohen me përgjegjësi për garantimin e dialogut dhe kompromisit institucional.
Begaj përgëzoi qytetarët e Kosovës për pjekurinë e treguar në një proces zgjedhor të rregullt, të qetë dhe demokratik.
“Urime Albin Kurti për rezultatin e arritur në zgjedhjet parlamentare në Republikën e Kosovës. Përgëzoj qytetarët e Kosovës për pjekurinë e treguar në një proces zgjedhor të rregullt, të qetë dhe demokratik, që dëshmoi edhe një herë forcën e institucioneve dhe të kulturës demokratike të shtetit të Kosovës”, ka deklaruar Begaj.
Presidenti shqiptar theksoi se në fazën paszgjedhore është e rëndësishme që të gjitha subjektet politike të kontribuojnë në ndërtimin e stabilitetit institucional. Begaj rikonfirmoi gjithashtu mbështetjen e Shqipërisë për Kosovën në proceset integruese, duke theksuar se Tirana do të vazhdojë të mbështesë Kosovën në çdo hap të rrugëtimit të saj euroatlantik dhe evropian.
