Presidenti i Republikës së Shqipërisë, Bajram Begaj ka kërkuar anëtarësimin e Kosovës në NATO.
Ai në konferencën e përbashkët për media pas takimit me Sekretarin e Përgjithshëm të NATO-s, Jens Stoltenberg, ka thënë se në kohën që po kalojmë është e arsyeshme pranimi i Kosovës në aleancën më të madhe ushtarake në botë.
“KFOR, është garantues i paqes dhe i sigurisë në Kosovë dhe rajon. Ne jemi duke kaluar kohë të sfidave të mëdha, të cilat kërkojnë vendime të guximshme dhe të drejta. Në këtë kontekst është në bindjen time se është më se e justifikueshme për ta konsideruar anëtarësimin e Republikës së Kosovës në Aleancën euro-atlantike. Shqipëria vlerëson shqetësuese kërcënimin që vjen nga Irani”, theksoi ai.
Ai foli edhe për propozimin evropian për normalizim të marrëdhënieve Kosovë-Serbi të cilin e quajti hap të mirë drejt njohjes reciproke.
“Që nga viti 2008, Republika e Kosovës është një vend sovran dhe i pavarur me vizion të qartë për t’u integruar në familjen euro-atlantike. Plani europian për normalizimin e marrëdhënieve është një hap pozitiv që do duhet të qendërzohet në njohjen reciproke ndërmjet dy shteteve. Vlerësoj maksimalisht angazhimin dhe përkushtimin e NATO-s në rajon dhe misionin KFOR, si një histori suksesi”, Begaj./teve1.info/
