Miratimi i Hartës Zonale të Mitrovicës së Jugut për periudhën 2024-2032, ishte pikë e rendit të ditës në mbledhjen e 39-të të Kuvendit Komunal të Mitrovicës së Jugut.
Por, një gjë e tillë dështoi në mungesë të kuorumit.
E ajo që ra në sy, është veprimi i kryetares së Kuvendit Komunal, Vesa Broja.
Ani pse kryetari nga partia e saj, Bedri Hamza, bëri thirrje të votohet Harta Zonale, Broja nuk pati votë pro.
Ky veprim i Brojes, befasoi bashkëpartiakët e saj.
“Ne jemi në demokraci, secili voton në mënyrën e lirë të vetën, sipas mendimeve të veta. Ne kemi mbajtur diskutime publike gjatë vitit 2022/23., kemi marrë kërkesa të qytetarëve, duke marrë parasysh që secili asamblist e përfaqëson një pjesë të komunitetit të tyre, po besoj që ish dashur që të paktën të mos i kthejnë gjërat personale, por të ndiqet interesi publik. Edhe për mua ka qenë befasi mos-kalimi i djeshëm për shkak të kuorumit”, tha Edison Tërnava, drejtor i urbanizmit.
Tëvë1 ka provuar të marrë një qëndrim të martën nga kryesuesja e kuvendit komunal, Vesa Broja.
Kjo e fundit, nuk i është përgjigjur thirrjeve të televizionit.
Por më vonë gjatë ditës, përmes një statusi në FB, ka thënë se partia e saj nuk ka pasur një qëndrim zyrtar rreth kësaj pike.
“Megjithatë, konsideroj se ai ka hapësirë të plotësohet në disa pjesë të tij, në mënyrë që të përmbushë sa më mirë nevojat reale të komunitetit në përgjithësi. Për këtë arsye kam vendosur të mos marr pjesë fare në votim. Ky ishte një vendim i qëllimshëm, i mbështetur në bindjet e mia dhe në mungesën e kushteve të nevojshme për një vendimmarrje të qartë dhe të përgjegjshme. Me këtë veprim, synova të mos bëhem pjesë e asnjërës palë dhe të ruaj një qëndrim të paanshëm e të matur në raport me çështjen në fjalë”, ka shkruar ajo.
E duket se me një moment të tillë, Broja do të përballet sërish.
“Ne presim që në seancën tjetër apo në një të jashtëzakonshme, varet se si vendos kabineti të procedojmë tutje, sepse më të vërtetë është një dokument i rëndësisë së veçantë. Po ashtu, është harta më e mirë në nivel vendi e cila është argumentuar nga Ministria e Planifikimit”, tha drejtori i urbanizmit në këtë komunë.
Në këtë votim, nuk mori pjesë opozita.
Për shkak të mungesës së kuorumit, mbledhja u ndërpre, duke mbetur të paproceduara pikat tjera të parapara për këtë seancë.
