Kandidati i Partisë Demokratike të Kosovës për kryeministër, Bedri Hamza, ka prezantuar pesë zotimet kryesore të programit të tij, duke deklaruar se synimi i tij është nxjerrja e vendit nga kriza dhe krijimi i një perspektive të re për qytetarët e Kosovës.
Hamza tha se prioritet i parë do të jetë përmirësimi i gjendjes ekonomike të familjeve dhe mbështetja e sektorit privat, përmes uljes së çmimeve dhe tatimeve, si dhe rritjes së pagave e pensioneve.
“50% më shumë para në xhepin e çdo familjeje kosovare. Më shumë mirëqenie për të gjithë”, tha Hamza.
Sipas tij, fokusi i dytë do të jetë zhvillimi ekonomik përmes investimeve në energji, infrastrukturë dhe teknologji moderne, me qëllim që Kosova të rrisë prodhimin dhe konkurrueshmërinë.
“Që Kosova të prodhojë më shumë, të zhvillohet më shpejt dhe të mbajë ritmin me rajonin dhe botën”, thotë Hamza, duke premtuar investime në këtë fushë.
Në kuadër të zotimeve, Hamza përmendi edhe reformimin e sistemit shëndetësor, duke premtuar shërbime më të shpejta dhe më të qasshme për qytetarët.
“Sigurime shëndetësore, barna falas për sëmundjet kronike dhe trajtim me dinjitet për secilin pacient. Shërimi është e drejtë, jo privilegj”, thotë Hamza.
Një tjetër prioritet, sipas tij, mbetet arsimi dhe krijimi i mundësive për të rinjtë, përmes bursave dhe aftësimit profesional për tregun e punës.
“Bursa, aftësi për tregun e punës dhe mbështetje për talentin e secilit të ri në Kosovë”, tha Hamza.
Në fund, kandidati i PDK-së theksoi se synon forcimin e sistemit të drejtësisë dhe garantimin e zbatimit të ligjit për të gjithë qytetarët pa dallim.
“Zbatim i plotë i ligjit për të gjithë. Drejtësi që nuk vonon!”, vijoi Hamza./teve1.info/
