Hysen Berisha nga Partia Demokratike e Kosovës ka deklaruar se Bedri Hamza mund të jetë kryetari i ri i këtij subjekti politik pas dorëheqjes së Memli Krasniqit nga ky post.
Në emisionin “Mesditë” në Tëvë1, Berisha ka thënë se Hamza është personi i duhur për ta udhëhequr PDK-në, pasi, sipas tij, posedon të gjitha aftësitë dhe përvojën e nevojshme për të drejtuar partinë.
“Më i rëndësishëm sesa emri është drejtimi që do të marrë partia, duke u bazuar në tri shtylla: besueshmërinë, përgatitjen dhe përgjegjësinë që duhet ta ketë ai që vjen në krye. PDK-ja ka dokumente që përcaktojnë mënyrën e funksionimit të brendshëm dhe rregullimin organizativ. Bedri Hamza është aktualisht i identifikuar si kandidat për kryeministër, por mund ta drejtojë edhe partinë, sepse i ka të gjitha aftësitë dhe është një histori suksesi”, ka deklaruar Berisha.
I pyetur nëse brenda PDK-së ekziston konsensus për zgjedhjen e Bedri Hamzës si kryetar të ri, Berisha u shpreh se mund të ketë një unanimitet të përgjithshëm.
“Ka pasur konsensus në konventën e nominimit të tij si kandidat për kryeministër, dhe ka pasur një unanimitet të përgjithshëm jo vetëm brenda forumeve të partisë, por edhe nga përkrahësit e PDK-së. Mendoj se ai do ta ketë këtë mbështetje edhe tani,” ka theksuar ai.
Megjithatë, sipas Berishës, PDK-ja ka edhe shumë personalitete të tjera që mund ta marrin drejtimin e partisë.
“Nuk është e thënë që nuk do të ketë edhe kandidatura të tjera, sepse PDK-ja ka shumë personalitete të mira që mund ta udhëheqin partinë drejt vizionit dhe përgjegjësive tona të përbashkëta,” ka përfunduar ai.
