Konstituimi i Parlamentit të Kosovës dhe formimi i qeverisë së re në vend, për Bashkimin Evropian, shihen si një fillim i ri për Kosovën në ndjekjen e agjendës evropiane.
Zyrtarët e BE-së përgëzojnë përpjekjet e udhëheqësve politikë për krijimin e hapësirës për dialog dhe ndërtimin e kompromisit për formimin e institucioneve.
“Ka shumë punë përpara për të avancuar marrëdhëniet BE–Kosovë dhe procesin e normalizimit me Serbinë. BE-ja pret me padurim hapjen e një kapitulli të ri në marrëdhëniet tona, të bazuar në vlera të përbashkëta dhe mirëkuptim të ndërsjellë”, thuhet në deklaratën e një zëdhënësi të BE-së.
Në këtë kontekst, nga zyra e shtypit e Bashkimit Evropian rikonfirmohet gatishmëria e shefes së diplomacisë evropiane, Kaja Kallas, për të organizuar së shpejti një takim të liderëve në kuadër të dialogut për normalizimin e marrëdhënieve mes Kosovës dhe Serbisë.
Nga selia e BE-së theksohet se mandati i fortë që ka marrë qeveria duhet t’i mundësojë Kosovës rikthimin në rrugën e saj drejt BE-së, veçanërisht përmes ripërcaktimit të përparësive të reformave të lidhura me integrimin evropian dhe shfrytëzimit sa më të mirë të mundësive që ofron Plani i Rritjes.
Bashkimi Evropian rikonfirmon gatishmërinë për ta mbështetur Kosovën në këtë proces./RTK
