Diskutimet për dinarin serb po vazhdojnë të jenë kryetemë në vend dhe jashtë saj. Kësaj radhe, e para e shtetit Vjosa Osmani po thotë se kjo çështje është e brendshme dhe mund të zgjidhet në Kosovë, derisa nga Bashkimi Evropian po kërkojnë që dinari të zgjidhet me dialog mirëpo, nuk japin detaje se çfarë pasoja mund të ketë Kosova nëse nuk merr pjesë.
Për çështjen e dinarit serb, u ftua takim edhe në Bruksel.
Mirëpo ndalimi i kësaj monedhe nga Banka Qendrore mund të zgjidhet në Kosovë, po thotë e para e shtetit Vjosa Osmani.
Madje për Osmanin, kjo çështje është e brendshme dhe nuk është dashur të shkaktojë përplasje me aleatët.
E nga Qeveria e Kosovës ende nuk ka një emër se kush do ta përfaqësojë vendin në takimin e 27 shkurtit.
Se a do të ketë pasoja për Kosovën nëse nuk merr pjesë në këtë takim, nuk ka dhënë detaje zëdhënësi i Bashkimit Evropian, Peter Stano.
Për Stanon, BE-ja është lehtësuesi për të gjetur një zgjidhje për Kosovën dhe Serbinë.
“Duhet t’i kthehemi praktikës së deritanishme që të mos flasim në publik dhe konferenca për shtyp për logjistikën e përgatitjeve të takimeve në nivel të grupeve punuese. Dërguam letrën për palët dhe sqaruam në detaje se si presim të merren me çështje të caktuara. Ne shpresojmë që të dyja palët do të gjejnë zgjidhje për një çështje që ishte krijuar me një vendim pa afat dhe pa konsultime të njërës palë, që pati ndikim te pala tjetër”, tha zëdhënësi i Bashkimit Evropian, Peter Stano.
Gjatë ditës, Tëvë1 ka dërguar pyetje edhe në Bankën Qendrore të Kosovës, se nëse dikush nga ky institucion merr pjesë në këtë takim, mirëpo të njëjtit nuk kanë dhënë përgjigje.
