Bashkimi Evropian ka kritikuar Kosovën për shkak të mbylljes së strukturave paralele në veri, pasi siç ka thënë, këto veprime bien ndesh me detyrimet e Kosovës ndaj BE-së.
BE-ja deklaron se këto veprime janë në kundërshtim me detyrimet e Kosovës ndaj BE-së.
“Veprimet e fundit të Kosovës kundër dhe mbyllja e strukturave të mbështetura nga Serbia, të kryera në mes të fushatës zgjedhore për zgjedhjet parlamentare të 9 shkurtit, bien ndesh me detyrimet e saj ndaj BE-së në kuadër të procesit të normalizimit. EULEX-i po monitoron kryerjen e këtyre veprimeve të fundit në përputhje me mandatin e tij,” thuhet në deklaratën e BE-së.
Më tej, thuhet se Bashkimi Evropian, nënvizon se statusi i strukturave të mbështetura nga Serbia duhet të zgjidhet përmes dialogut.
“Kosova duhet të demonstrojë dhe të qëndrojë konsistente me obligimet e saj në kuadër të dialogut të lehtësuar nga BE-ja dhe riangazhimit të fundit të saj ndaj tij”, thuhet tutje në reagim.
Në fund në reagim thonë se këto veprime të Kosovës s’ndihmojnë heqjen e masave, që BE ka thënë se do t’i heqë paralelisht me veprimet që duhet t’i ndërmarrë Kosova.
“Përderisa, siç thuhet në konkluzionet e Këshillit të vitit 2024 për zgjerimin, BE-ja gradualisht do të heqë masat ndaj Kosovës paralelisht me hapat e mëtejshëm të Kosovës për të de-përshkallëzuar tensionet në veri, këto veprime nuk janë të favorshme për këtë qëllim”, përfundon reagimi.
Ndryshe, Policia e Kosovës në bashkëpunim me institucionet kompetente të mërkurën ka realizuar një aksion policor në disa rajone të Kosovës.
Ministri i Brendshëm, Xhelal Sveçla ka njoftuar se janë mbyllur strukturat paralele “kriminale” të Serbisë në Republikën e Kosovës.
Sipas ministrit, komunat paralele të Serbisë janë mbyllur në Lipjan, Obiliq, Prishtinë, Fushë-Kosovë, Vushtrri, Novobërdë, Kamenicë, Viti, Rahovec, Skënderaj si dhe posta e zyreve tatimore ilegale.
Ndërkaq, Prokuroria Themelore në Prishtinë ka thënë se nuk ka lëshuar autorizim për bastisjet në objektet e strukturave paralele.
