Pas arritjes së marrëveshjes për çështjen e dokumenteve të identifikimit mes Republikës së Kosovës dhe Serbisë, pritjet janë që të konkretizohet edhe marrëveshja për çështjen e targave.
Gjatë fundjavës, për këtë temë ka folur Shefi i diplomacisë evropiane Josep Borrell, i cili në një intervistë për shërbimin publik austriak ORF, u shpreh i bindur se është e mundur të zgjidhet problemi i hapur për targat ndërmjet Kosovës dhe Serbisë.
Por, pavarësisht pritshmërive, njohësi i çështjeve politike, Visar Xani, thotë se deklarimet e Beogradit duhet të merren me rezerva, pasi siç thotë ai, pala serbe çdo here ka refuzuar zbatimin e marrëveshjeve të arritura.
Ndërsa politologu, Dritëro Arifi, është skeptik se mund të arrihet marrëveshje para 1 shtatorit, por ai thotë se Kosova duhet të insistojë në parimin e reciprocitetit.
Marrë parasysh tensionet në rritje, jo vetëm SHBA-ja e BE-ja, por edhe NATO, i kanë ftuar Kosovën dhe Serbinë që të shmangin përshkallëzimin dhe të ulen në tavolinën e dialogut.
Kronika e gazetarit Valmir Gallopeni.
