Bashkimi Evropian ka bërë të ditur se ekspertët e Mjekësisë Ligjore të EULEX-it po asistojnë Institutin e Mjekësisë Ligjore të Kosovës në gërmimet që po zhvillohen në Zubin Potok, ku po verifikohet një lokacion që dyshohet se mund të jetë varrezë e pashënuar me persona të zhdukur.
Në një përgjigje për Tëvë1, BE-ja tha se ekspertët e EULEX-it kanë ndihmuar homologët e tyre nga IML-ja në vlerësimin e lokacionit dhe po marrin pjesë aktivisht në operacionin e zhvarrimit, i cili është rifilluar në këtë zonë.
“Konfirmojmë se ekspertët e Mjekësisë Ligjore të EULEX-it kanë asistuar homologët e tyre nga Instituti i Mjekësisë Ligjore i Kosovës në vlerësimin e një lokacioni në Zubin Potok, me qëllim identifikimin e një vendi të mundshëm të një varreze të pashënuar ku mund të ndodhen persona të zhdukur. Ekspertët e EULEX-it po marrin pjesë aktivisht në operacionin e zhvarrimit, i cili është rifilluar në këtë lokacion nga Instituti i Mjekësisë Ligjore”, thuhet në përgjigjen e BE-së.
Në të njëjtën përgjigje, BE-ja thekson se EULEX-i nuk zhvillon hetime penale, pasi kjo është kompetencë e autoriteteve të Kosovës.
Sipas BE-së, ndihma për zbardhjen e fatit të personave që ende rezultojnë të zhdukur nga konflikti mbetet një element kyç i dialogut të lehtësuar nga Bashkimi Evropian.
Po ashtu, BE-ja rikujton se Komisioni i Përbashkët për Personat e Zhdukur, i themeluar në bazë të Deklaratës për Personat e Zhdukur të vitit 2023 dhe i kryesuar nga Përfaqësuesi Special i BE-së për Dialogun Beograd–Prishtinë, mbikëqyr zbatimin e kësaj deklarate dhe synon të ndihmojë në sqarimin e fatit të personave të zhdukur.
Në përgjigjen për Tëvë1, BE-ja thekson gjithashtu se ka ofruar mbështetje financiare për Institutin e Mjekësisë Ligjore të Kosovës në funksion të përpjekjeve për zbardhjen e fatit të personave të zhdukur.
