Bashkimi Evropian hedhi poshtë rezultatet e zgjedhjeve në Bjellorusi të dielën si të paligjshme dhe kërcënoi me sanksione të reja.
Bjellorusia mbajti një votim praktikisht të garantuar për t’i dhënë presidentit autokratik 70-vjeçar Aleksandër Lukashenko edhe një mandat, krahas tre dekadave të tij në pushtet.
“Zgjedhjet e rreme të sotme në Bjellorusi nuk kanë qenë as të lira, as të drejta,” thanë në një deklaratë të përbashkët shefja e politikës së jashtme të BE-së Kaja Kallas dhe komisionerja për zgjerimin e BE-së Marta Kos.
“Shtypja e pamëshirshme dhe e paprecedentë e të drejtave të njeriut, kufizimet në pjesëmarrjen politike dhe aksesin në mediat e pavarura në Bjellorusi, e kanë privuar procesin zgjedhor nga çdo legjitimitet”, thanë Kallas dhe Kos.
Ata i kërkuan qeverisë bjelloruse të lirojë të burgosurit politikë, duke e vlerësuar numrin e tyre në më shumë se 1000, duke përfshirë një punonjës të delegacionit të BE-së në kryeqytetin e Bjellorusisë, Minsk, raporton AP.
Kallas dhe Kos thanë se vendimi për të ftuar vëzhgues nga Organizata për Siguri dhe Bashkëpunim në Evropë vetëm 10 ditë më parë e pengoi grupin të monitoronte procesin e plotë zgjedhor.
“Për këto arsye, si dhe përfshirjen e regjimit të Bjellorusisë në luftën e agresionit të Rusisë kundër Ukrainës dhe sulmet e saj hibride kundër fqinjëve të saj, BE do të vazhdojë të vendosë masa kufizuese dhe të synuara” kundër qeverisë bjelloruse, thanë zyrtarët e BE-së.
Ata nuk elaboruan se çfarë do të synonin sanksionet e reja eventuale, ose nuk jepnin një kornizë kohore.
Kallas dhe disa ministra të jashtëm të BE-së pritet të takohen me udhëheqësen e opozitës bjelloruse Sviatlana Tsikhanouskaya të dielën mbrëma në Bruksel për një darkë joformale me dyer të mbyllura.
