Transferimi i qetë i pushtetit në katër komunat veriore nuk i bindi të gjitha shtetet anëtare të Bashkimit Evropian për t’i hequr masat ndëshkuese ndaj Kosovës.
Megjithatë ka disa lëvizje pozitive në këtë drejtim sepse BE-ja ka vendosur që t’i heq gradualisht këto masa.
Komisioni Evropian do të lëshojë 50%, apo 216 milionë euro të ndihmës financiare për Kosovën në kuadër të procesit të heqjes së masave ndëshkuese.
Një zëdhënës i Komisionit Evropian tha për Tëvë1 se deri tek ky vendim kanë ardhur pas transferimit të qetë të pushtetit në veri.
“Kjo do të mundësojë: nënshkrimin e kontratave për 4 projekte (që në total përfaqësojnë 34.6 milionë euro kontribut të BE-së) dhe nisjen e zbatimit të tyre; përfundimin e programimit të të gjitha fondeve të mbetura IPA III të dedikuara për Kosovën (181 milionë euro; me miratimin e planifikuar të vendimit të financimit nga Komisioni në pranverë të vitit 2026, që do të lejonte nisjen e projekteve të para në gjysmën e dytë të vitit 2026”, ka njoftuar i Komisioni Evropian.
Zv.kryeministri në detyrë, Besnik Bislimi, i ka mirëpritur heqjen e masave ndërsa tha se ky proces duhet të vijoj me heqjen e plotë të tyre.
Ndërkaq, analisti politik, Agon Maliqi shpjegon arsyet pse blloku nuk është bindur për t’i larguar masat ndëshkuese.
“Nuk mund të pritet që ata të marrin një vendim të tillë në periudhën e fushatës zgjedhore. Ata mund ta konsiderojnë si ndërhyrje në prag të zgjedhjeve dhe gjithashtu do të shihej si fitore qeverinë aktuale në detyrë”, ka thënë Maliqi.
Tutje, Maliqi tregon se janë disa shtetet të mëdha brenda BE-së që janë skeptike për këtë çështje.
“Ka disa shtetet që i prijnë këtij hezitimi dhe është raportuar për këto shtete siç janë; Franca, Italia dhe Hungaria. Besoj që pas zgjedhjeve mund të ketë një ndryshim të vogël të pozicionit. Por, edhe në atë rast besoj do të pritet edhe diçka përtej transferimit të qetë të pushtetit. Do të shikohet se si do të jetë qasja konkrete me këto komuna nga niveli qendror”, ka thënë tutje Maliqi.
Kujtojmë që masat ndëshkuese ndaj Kosovës u vendosën pas shpërthimit të tensioneve në veri në vëren e vitit 2023.
Ish-shefi i politikës së jashtme të BE-së, Josep Borrell, para largimit nga detyra kishte kërkuar që këto masa të hiqeshin ndaj Kosovës.
