Këtë e konfirmuar për Tëvë1 Peter Stano, zëdhënësi kryesor për Punët e Jashtme dhe Politikën e Sigurisë.
“Raundi tjetër i takimeve të Grupit të Punës do të zhvillohet më 20 dhe 21 prill në Bruksel, pak para se mandati i tij të përfundojë më 21 prill. BE-ja ka ndihmuar të dy delegacionet në identifikimin e zgjidhjeve, por është përgjegjësi e të dyja palëve të bien dakord për një zgjidhje. Ne presim që ata të bëjnë përparim deri më 21 prill”, ka deklaruar Stano për Tëvë1.
Më tej, ai ka thënë se Bashkimi Evropian e konsideron urgjente arritjen e një marrëveshje për çështjen e targave.
“BE-ja dëshiron t’u kujtojë të dyja palëve edhe një herë se tani është urgjente për të gjetur gjuhën e përbashkët. Çdo marrëveshje për targat do të kërkojë fleksibilitet politik dhe kompromis”, është shprehur më tej Stano.
Kështu, më 21 prill, kryenegociatorët e Kosovës dhe Serbisë, Besnik Bislimi dhe Petar Petkoviq, po ashtu pritet të takohen me ndërmjetësimin e të dërguarit të BE-së për dialogun, Mirosllav Lajçak.
Ndërkohë, kryeministri i Kosovës, Albin Kurti ditë më parë ka thënë se për Kosovën është i padiskutueshëm dhe panegociueshëm “parimi i reciprocitetit si thelb i çfarëdo zgjidhjeje të ardhshme” për çështjen e targave. /teve1.info/
