Qeveria e Mbretërisë së Bashkuar dhe Bashkimi Evropian kanë shpallur një valë të re sanksionesh të koordinuara ndaj Rusisë, në përgjigje të luftës së vazhdueshme në Ukrainë dhe refuzimit të Moskës për të pranuar një armëpushim.
Paketa e re e sanksioneve synon të godasë në mënyrë më të thellë ekonominë ruse dhe makinerinë e saj ushtarake, përmes goditjes së sektorëve kyç si energjia, financat, mbrojtja dhe propaganda.
Në një deklaratë zyrtare, qeveria britanike njoftoi vendosjen e 100 sanksioneve të reja, të cilat përfshijnë individë dhe entitete që mbështesin përpjekjet ushtarake të Rusisë, sektorin energjetik dhe ata që marrin pjesë në fushatat dezinformuese të Kremlinit kundër Ukrainës.
“Mbretëria e Bashkuar dhe partnerët tanë ndërkombëtarë po punojnë gjithashtu për të shtrënguar kufirin e çmimit të naftës, për të goditur më tej të ardhurat e rëndësishme të Rusisë nga ky sektor jetik për financimin e luftës,” thuhet në deklaratë.
Ndërkohë, Bashkimi Evropian ka miratuar paketën e 17-të të sanksioneve ndaj Rusisë. Shefja e politikës së jashtme të BE-së, Kaja Kallas, tha se masat e reja synojnë kryesisht të ashtuquajturën “flotë në hije” të anijeve cisternë ruse, të cilat përdoren për të anashkaluar kufizimet ndërkombëtare ndaj eksportit të naftës.
“BE-ja ka miratuar paketën e 17-të të sanksioneve, duke synuar gati 200 anije të flotës në hije. Masat e reja adresojnë gjithashtu kërcënimet hibride dhe shkeljet e të drejtave të njeriut,” tha Kallas në një postim në rrjetin X.
Ajo shtoi se më shumë sanksione janë në përgatitje, duke paralajmëruar se “sa më gjatë të vazhdojë lufta e Rusisë, aq më e ashpër do të jetë përgjigjja jonë”.
Kallas gjithashtu i bëri thirrje Shteteve të Bashkuara që të ndërmarrin masa më të forta kundër Rusisë, nëse Moska refuzon të angazhohet për një armëpushim pa kushte. “Amerika ka thënë se do të ketë pasoja. Tani është koha t’i shohim ato pasoja,” tha ajo pas një takimi të ministrave të BE-së në Bruksel, raporton The Guardian.
Në të njëjtën linjë, kancelari gjerman Friedrich Merz deklaroi pas një telefonate të përbashkët midis Presidentit Trump dhe disa udhëheqësve evropianë, se Bashkimi Evropian është i vendosur të rrisë presionin mbi Moskën. “Ne do të vazhdojmë të shtrëngojmë masat tona ekonomike për ta detyruar Rusinë të ndalë agresionin e saj,” tha Merz.
Ndërkohë që lufta vazhdon, Perëndimi po dërgon një sinjal të qartë: çdo refuzim i dialogut nga Rusia do të përballet me pasoja të rënda ekonomike dhe politike.
