Shefja e politikës së jashtme të BE-së, Kaja Kallas, njoftoi të martën se Këshilli i Punëve të Jashtme të Bashkimit Evropian do të shqyrtojë mundësinë e pezullimit të marrëveshjes së asociimit me Izraelin.
Kjo vjen pas një propozimi nga ministrja e Jashtme e Holandës për të rishikuar Nenin 2 të marrëveshjes, në kontekstin e përkeqësimit të situatës humanitare në Gaza, raporton Anadoly.
“Situata në Gaza është e tmerrshme. Ndihma humanitare duhet të arrijë atje sa më shpejt,” tha Kallas para takimit në Bruksel. Ajo shtoi se megjithëse Izraeli ka lejuar hyrjen e ndihmave, kjo është “vetëm një pikë uji në oqean”. Sipas saj, mijëra kamionë me ndihma të financuara nga BE po presin në kufi dhe ato duhet të shpërndahen menjëherë.
Kurse ministri i Shtetit të Irlandës për Zhvillim Ndërkombëtar dhe Diasporë, Neale Richmond, në komentet e tij para fillimit të një takimi të Këshillit të Punëve të Jashtme të BE-së në Bruksel, tha: “Është me të vërtetë e rëndësishme që qeveria irlandeze të nënvizojë absolutisht detyrimet e Izraelit ndaj shteteve anëtare të BE-së dhe popullit të Gazës, për t’u siguruar që të shohim një korridor të duhur humanitar të hapur dhe që, po, të shqyrtojmë Nenin Dy dhe të shqyrtojmë detyrimet e Izraelit për të drejtat e njeriut ndaj popullit të Gazës dhe në fakt të Bregut Perëndimor.”
Ai nënvizoi se ata do t’ia bëjnë të qartë shefes së politikës së jashtme të bllokut, Kaja Kallas, se nuk nevojitet një vendim me shumicë ose unanim për të pezulluar marrëveshjen e asociimit me Izraelin.
“Tani është koha të sigurohemi që jo vetëm ta mbajmë Izraelin përgjegjës, por në fakt të tregojmë se BE-ja beson në sundimin e ligjit dhe beson në mbrojtjen e vlerave tona”, shtoi Richmond.
