Këshilli Evropian të hënën ka aprovuar rregulla të reja që do ta bëjnë më të lehtë për bllokun suspendimin e vizave të shkurtra për vendet jashtë BE-së, në veçanti në rastet e shkeljeve të të drejtave të njeriut.
Reforma ka për synim të forcojë mekanizmin e suspendimit për vizat e Bashkimit Evropian që momentalisht mbulon 61 vende, qytetarët e të cilëve mund të hynë në zonën Shengen pa viza për një periudhë 90-ditore ose 180 ditë.
Mekanizmi i përditësuar prezanton baza të reja për shkaktimin e një pezullimi, duke i lejuar BE-së të revokojë statusin pa viza të një vendi nëse shkeljet e të drejtave të njeriut përkeqësohen ose nëse marrëdhëniet më të gjera me bllokun prishen, sipas një deklarate.
Si pjesë e këtij mekanizmi, BE-ja mund të veprojë edhe kundër shteteve, veprimet e të cilave dallojnë nga rregullat e vizave të BE-së ose atyre që operojnë skema të shtetësisë për investitorët që u japin shtetësi individëve pa lidhje të vërteta me vendin, praktika që BE-ja i konsideron një rrezik sigurie.
Rregullorja ul pragun për aktivizimin e mekanizmit të pezullimit. Një rritje prej 30% e refuzimit të hyrjes, tejkalimit të afatit të qëndrimit, aplikimeve për azil ose veprave të rënda penale tani do të përmbushë kriteret për një “rritje të konsiderueshme”, krahasuar me pragun e mëparshëm prej 50%.
Kohëzgjatja e një pezullimi fillestar do të zgjatet nga nëntë në 12 muaj. Kjo mund të pasohet nga një zgjatje 24-mujore, më e gjatë se 18 muajt aktualë, duke i dhënë BE-së kohë shtesë për të punuar me vendin për të zgjidhur problemet përpara se të merret në konsideratë një revokim i përhershëm, raporton Anadolu.
Ndryshe nga rregullat aktuale, të cilat ndikojnë automatikisht te të gjithë shtetasit kur zgjatet një pezullim, mekanizmi i ri i lejon BE-së të shënjestrojë grupe specifike, duke përfshirë zyrtarë qeveritarë dhe diplomatë, gjatë fazës së zgjatur.
Rregullorja e përditësuar do të hyjë në fuqi 20 ditë pas botimit në Gazetën Zyrtare të BE-së dhe do të jetë drejtpërdrejt e zbatueshme në të gjitha shtetet anëtare.
