Partia më e madhe e shqiptarëve në Maqedoninë e Veriut, Bashkimi Demokratik për Integrim (BDI) i ka dënuar thirrjet raciste ndaj shqiptarëve gjatë ndeshjes së basketbollit që u zhvillua në mes të Maqedonisë së Veriut dhe Rumanisë, të shtunën në Kumanovë.
BDI e ka cilësuar incidentin si një shfaqje të tmerrshme të urrejtjes etnike dhe ka kërkuar dorëheqjen e menjëhershme të zëvendësministrit të Punëve të Brendshme, Astrit Iseni, dhe zëvendësministres për Sport, Safije Sadiki Shaini, për shkak të mosreagimit ndaj thirrjeve me përmbajtje fashiste.
“BDI dënon këtë incident, duke e cilësuar si një shfaqje të tmerrshme të urrejtjes etnike dhe duke kritikuar heshtjen e institucioneve dhe mungesën e reagimit nga Federata e Basketbollit, Ministria e Punëve të Brendshme dhe Qeverisë së MV”, deklaroi Emir Sulejmani, anëtar i Kryesisë Qendrore, në një konferencë të mbajtur sot, më 4 gusht.
Sulejmani ka theksuar se BDI nuk do të lejojë që shqiptarët të bëhen shënjestër e thirrjeve fashiste.
“Ne nuk do të lejojmë që shqiptarët të bëhen shënjestër e thirrjeve fashiste në vendin ku janë bashkëthemelues të shtetit. BDI do të qëndrojë në krye të reagimit politik dhe qytetar deri në sigurimin e drejtësisë dhe ndëshkimin e përgjegjësve”, ka deklaruar Sulejmani.
Ai iu ka bërë thirrje përfaqësuesve shqiptarë në Qeverinë e Maqedonisë, që të distancohen publikisht nga ngjarja, të kërkojnë sanksione të rënda dhe të tërhiqen nga një Qeveria që toleron urrejtjen.
Gjatë ndeshjes, në sallë u dëgjuan thirrje si “Shqiptari i mirë është shqiptari i vdekur” dhe “Dhoma e gazi për shqiptarët”, mes të pranishmëve edhe krerëve të lartë shtetërorë të Maqedonisë së Veriut, përfshirë kryeministrin Hristijan Mickoski dhe kryetarin e Kumanovës, Maksim Dimitrievski.
