Përfaqësuesja e Kosovës U18 në konkurrencën e meshkujve është shpallur kampione e FIBA U18 EuroBasket 2026, Divizioni C, pasi në finalen e zhvilluar në Shkodër e mposhti bindshëm Andorrën me rezultat 91:49.
Basketbollistët e rinj të Kosovës zhvilluan një paraqitje dominuese, duke kontrolluar takimin nga fillimi deri në fund dhe duke e kurorëzuar me trofe një kampionat të shkëlqyer.
“Dardanët” e rinj e përfunduan turneun me bilanc perfekt, duke regjistruar pesë fitore në po aq ndeshje, pa pësuar asnjë humbje. Gjatë gjithë kampionatit ata dëshmuan nivel të lartë loje, disiplinë dhe karakter, për t’u ngjitur në majën e Divizionit C.
Ky sukses përfaqëson një arritje të rëndësishme për basketbollin kosovar dhe një tregues premtues për të ardhmen e gjeneratave të reja të këtij sporti.
