Federata e Basketbollit të Kosovës, të martën ka mbajtur konferencë në lidhje me organizimet që do t’i ketë gjatë kësaj vere. Megjithatë, fokusi i FBK-së, mbetet Kampionati Evropian për Shtete të Vogla për basketbolliste që mbahet në Prishtinë për herë të parë. Turneu do të zhvillohet prej datës 25 deri më 30 qershor, ndërsa Kosova do të paraqitet për herë të parë në këtë ngjarje. Kreu i FBK-së, Arben Fetahu ka premtuar një organizim madhështor të këtij evropiani, ndërsa ka folur edhe për synimet e Kosovës, e që janë të përfundoj në mesin e shteteve që do të stolisen me medalje.
Në krye të basketbollisteve të Kosovës, do të jetë trajneri nga Kroacia, Viktor Kovaq. Ai ka disa ditë që ka nisur punën me ekipin e tij dhe sigurisht se synon rezultate të mira në këtë kampionat. “Dardanet” janë pjesë e Grupit A, së bashku me Gjeorgjinë, Qipron dhe Maltën, ndërsa Grupi B përbëhet nga Shqipëria, Norvegjia, Andorra dhe Armenia.
Rreth përgatitjeve dhe atmosferës në ekip, kanë folur edhe kapitenia Arbnore Perquku, si dhe Astera Tuhina, e cila si lojtare po zhvillohet në njërin prej kolegjeve të SHBA-së. Të dyja kanë insistuar se atmosfera është shumë e mirë, stërvitjet po shkojnë sipas planit dhe me padurim po e presin turneun për të arritur rezultate të mira.
Sa i përket detajeve tjera në lidhje me grumbullimin e ekipit, ato janë zbuluar nga drejtori Adriatik Rraci. Ai ka bërë të ditur se basketbollistet kanë nisur stërvitjet me 30 maj dhe deri më tani, gjithçka ka shkuar në mënyrën më të mirë të mundshme. Në fund të kësaj konference, u bë edhe prezantimi zyrtar i trajnerit Viktor Kovaq, i cili së bashku me kreun e FBK-së, Arben Fetahu firmosën kontratën për bashkëpunim.
Kovaq e njeh mirë kampionatin e Kosovës pasi në dy sezonet e fundit ka udhëhequr Bashkimin e Prizrenit, ekip me të cilin ka fituar gjashtë trofe: dy tituj, dy kupa dhe dy Superkupa në basketbollin e femrave.