Pas një pushimi prej më shumë se një jave shkaku i ndeshjeve të kombëtareve, rikthehet Superliga e Kosovës në basketboll me xhiron e rregullt të këtij sezoni.
Në fakt, në mesjavë do të luhet xhiroja e tetë e elitës së basketbollit kosovar, ku pritet të ketë përballje tejet interesante.
Katër ndeshjet e kësaj xhiroje, do të luhen brenda dy ditëve, dy duele të mërkurën dhe dy të tjera, të enjten, me të cilat mbyllet xhiro.
Bashkimi që është ekipi i vetëm pa humbje pas shtatë xhirosh, e pret në palestrën “Sezai Surroi” skuadrën e Vëllaznimit nga Gjakova.
Me një pikë më pak se Bashkimi në tabelë, skuadra e Pejës në këtë xhiro ka një ndeshje të vështirë pasi e pret kampionen në fuqi, Trepçën në palestrën “Karagaçi”.
Sigal Prishtina në kryeqytet do të përballet me Golden Eagle Yllin kurse Bora do të jetë mysafire e Rahovecit 029, ekip që po debuton këtë sezon në Superligë.
