Dy ndeshje, njëra në Prizren dhe tjetra në Gjakovë do ta karakterizojnë xhiron e 28-të në Superligën e Kosovës në basketboll.
Me këto dy përballje që luhen në mbrëmje nuk do të përfundoj vetëm xhiroja e 28-të por edhe stinori i rregullt i këtij sezoni, ku pastaj do të fillojnë garat e play-offit.
Të dyja ndeshjet, si ajo në Prizren dhe në Gjakovë, do të startojnë prej orës 20:00, ku do të përballen Bashkimi – Peja dhe Vëllaznimi – Sigal Prishtina.
Në Prizren luhet për pozitën e parë në stinorin e rregullt kurse në Gjakovë, tashmë gjërat janë të definuara.
Vëllaznimi do të futet në play-off nga pozita e gjashtë dhe do të luaj në serinë çerekfinale, ku do të përballet me Sigal Prishtinën, e cila pavarësisht rezultatit të sotëm do të përfundoj në pozitën e tretë.
Bashkimit i duhet fitorja ndaj Pejës për ta mbyllur stinorin e rregullt në pozitën e parë në tabelë, të cilën aktualisht e mbanë Trepça me 47 pikë, një më shumë se prizrenasit.
Ndërkohë, Peja do të përfundoj e pesta në tabelë dhe në çerekfinale të play-offit do të përballet me Golden Eagle Yllin e pozitës së katërt.
Dy vendet e para në stinorin e rregullt, do të avancojnë direkt në gjysmëfinale të play-offit, ku i presin fituesit e serisë çerekfinale.
Bashkimit për duelin me Pejën, i rikthehet amerikani Jayveous McKinnis, i cili ka qenë i lënduar për disa javë dhe është lojtari kryesor i ekipit nga Prizreni.
