Veri e jug u bënë bashkë.
Për herë të parë pas 25 vitesh, u themelua bordi i dy komunave, Mitrovicës Veriore dhe asaj jugore, i cili do të kryesohet nga ministri në detyrë i Ministrisë për Administrimin e Pushtetit Lokal, Elbert Krasniqi.
Ky partneritet parashihet me Ligjin për kufijtë administrativë të komunave i cili parashikon bashkëpunim të ngushtë ndërmjet dy komunave përmes krijimit të një Bordi të përbashkët funksional.
Themelimi i Bordit të përbashkët ndërmjet Komunës së Mitrovicës -veriu dhe asaj jugu parasheh bashkërendim në fusha kyçe si infrastruktura, mjedisi, zhvillimi ekonomik dhe shërbimet komunale.
Kryesuesi i këtij bordi, Elbert Krasniqi si përfaqësues i kryeministrit në detyrë, Albin Kurti, tha se me këtë hap do të përmirësohet më shumë jetesa e qytetarëve.
“Qëllimi i bordit është që të krijohen ura bashkëpunimi midis dy komunave që të shkëmbehen eksperiencat e mira mes dy komunave, të krijohen shërbime më të mira për qytetarët e komunës së Mitrovicës së Veriut dhe asaj të Jugut. Ne së shpejti do të takohemi prapë, do të akordojmë në detaje secilin prioritet tanin dhe do të caktohen afatet kohore për implementimin e tyre”, tha Krasniqi.
E anëtarja e komunitetit, Katarina Adançiq në një përgjigje për Tëvë1, tha se ky bord ka qenë dashur të formohet më herët.
Ajo tregoi disa plane të cilat pritet të realizohen, duke nisur nga pastrimi i lumit Ibër në të cilin po derdhën ujëra të zeza, vendosja e tubacioneve dhe projekte të tjera.
“ Sipas mendimit tim, ky bord, i cili u krijua dje, duhet të kishte ekzistuar shumë vite më parë. Çdo gjë që lidhet me realizimin e përmirësimit të ruajtjes së kushteve të jetesës së qytetarëve është në interesin tonë të përbashkët. Ne kemi një lum të përbashkët, Ibër që është lënë pas dore, në të cilën derdhen ujërat e zeza të qytetit nga veriu dhe jugu. Lumi që, për shkak të pakujdesisë njerëzore, përmbyti familjet disa herë me dëme të mëdha materiale. Disa vite më parë, pati një projekt nga BE që dhuroi para për përmirësimin e lumit, ndërtimin e shëtitoreve në të dy anët e bregdetit, instalimi i filtrave dhe pastruesve në tubacionet e ujërave të zeza”, tha Adançiq.
Ndërkaq anëtarja nga radhët e Partisë Demokratike të Kosovës, Valdete Idrizi që vjen nga komuna e Mitrovicës së jugut, thotë se edhe të premten është mbajtur një mbledhje ku është ka kërkuar më shumë për qartësimin e mandatit.
“Ani pse me ftesë shumë afatshkurta për mbledhjen inauguruese të bordit të Mitrovicës, u arrit që të mbahet mbledhja konstituive e Bordit me qëllim të bashkëpunimit midis dy komunave. Unë e pyeta rreth mandatit të këtij bordi, pasi që një udhëzues administrativ është shfuqizuar vite më herët, kryesuesi i bordit i deleguari i KM ministri në detyrë Elbert Krasniqi, na siguroi që në mbledhjen e radhës do të punohet për të qartësuar mandatin, udhëzuesin si dhe projektet eventuale të përbashkëta që ofrojnë qytetarët respektivisht dy pjesët e lumit Ibër”, tha Idrizi.
Bordi përbëhet nga njëmbëdhjetë anëtarë, përfshirë komunitetet, shqiptarë, serbë, boshnjakë dhe egjiptian, duke respektuar bazën gjinore me pesë gra e gjashtë burra.
