Komisioni i Arbitrazhit në Federatën e Basketbollit të Kosovës, mërkurën e ka shpallur si “të pranueshme” ankesën e Bashkimit dhe e ka ndryshuar vendimin, duke e dënuar vetëm me një ndeshje pa shikues dhe dy të tjera pa shikues VIP.
Ndërkohë gjoba prej 2 mijë eurove është zbritur në 1.500 euro.
Në dënimin e Komisionit të Garave, klubi nga Prizreni ishte dënuar me tri ndeshje pa shikues për incidentin e rëndë që ndodhi në fund të ndeshjes me Pejën.
Por Komisioni i Arbitrazhit, vendimi i të cilit nuk mund të kontestohet brenda FBK-së, ka vlerësuar se dënimi me një ndeshje pa shikues dhe dy të tjera pa shikues VIP janë të mjaftueshme që të dërgohet mesazhi i qartë te Bashkimi se organizimi i sigurt i ndeshjeve është jetik për mbarëvajtjen e garave.
Pesë sekonda para fundit të vazhdimit prej pesë minutave në mes të Bashkimit dhe Pejës në “Sezai Surroi” të dielën, në parket, në pjesën ku ishin të vendosur shikues, ndodhi një incident.
Të përfshirë ishin shumë persona, ndërsa u shkëmbyen grushte, ku drejtues të Bashkimit kanë pasur një përplasje me pjesëtarë të kompanisë së sigurimit, të angazhuar për të mbajtur rendin në palestër.
Bashkimi, që e përfundoi serinë e rregullt në vendin e parë, po udhëheq 2:1 në seri ndaj Pejës kurse të enjten luhet ndeshja e katërt në palestrën “Karagaçi” në Pejë.
