Sot zhvillohen dy ndeshjet e fundit të xhiros së 12-të të elitës së basketbollit kosovar.
Takimi që pritet me më shumë vëmendje luhet në palestrën “Sezai Surroi”, ku do të përballen Bashkimi dhe Golden Eagle Ylli.
Të dy skuadrat kërkojnë fitore, pasi vijnë nga humbjet: Bashkimi pësoi nga Trepça, ndërsa Ylli nga Prishtina.
Portokallezinjtë nga Prizreni ndodhen momentalisht në pozitën e tretë me 7 fitore dhe 4 humbje, ndërsa therandasit janë në vendin e fundit me vetëm 3 fitore kundrejt 8 humbjeve.
Sa i përket rosterit të lojtarëve, si trajneri Jovoviq ashtu edhe Sarin do t’i kenë skuadrat e kompletuara.
Ndeshja tjetër e ditës zhvillohet në palestrën “Minatori” në Mitrovicë, ku do të përballen Trepça dhe Bora.
Këto dy skuadra u takuan edhe të martën, kur “Xehtarët” fituan me shifrat 90:72, ndeshje kjo që i përkiste xhiros së pestë të Superligës së Kosovës në basketboll.
Trepça momentalisht është në vendin e dytë të renditjes tabelare dhe me një fitore eventuale bëhet sërish lidere e Superligës.
Sa i përket Borës nga kryeqyteti, ajo ndodhet në vendin e gjashtë me bilanc prej 5 fitoresh dhe 6 disfatash.
Të dyja këto takime fillojnë nga ora 18:45 dhe mund t’i ndiqni drejtpërdrejt në platformën “Telkos”.
