Sot, me fillim nga ora 19:00, hapet xhiroja e 15-të e Superligës së Kosovës në basketboll.
Do të jenë dy ndeshje interesante këtë mbrëmje, ku vëmendja do të jetë në Prizren në duelin Bashkimi – Trepça.
Këto dy skuadra në këtë edicion janë takuar 2 herë, me të dy ekipet që e kanë fituar nga një ndeshje, dhe përballja e tretë pritet të jetë tejet sfiduese.
Momentalisht Bashkimi është pa trajner, pasi javë më parë ka ndarë rrugët me Darko Raduloviqin, të cilin ndaj Trepçës do ta zëvendësoj ndihmësi i tij, Bledar Gjeçaj.
Si Bashkimi ashtu edhe Trepça kanë bërë ndryshime të vogla në ekip gjatë afatit kalimtar të rregullt, me prizrenasit që kanë angazhuar amerikanët Erick Copes e Ëendell Green kurse mitrovicasit kanë marrë Michael Myersin.
Trepça prinë në Superligë me 11 fitore karshi 3 humbjeve, ndërsa Bashkimi renditet i dyti me 9 fitore dhe pesë disfata në dy fazat e stinorit vjeshtor.
Dueli tjetër i mbrëmjes, që gjithashtu starton në orën 19:00, është ai ndërmjet Borës dhe Golden Eagle Yllit që luhet në Prishtinë.
Bora ka shfrytëzuar afatin kalimtar, duke u forcuar me Henrik Shirkon, Musab Malën e Desmond Cambridgen. Ndërkohë, Ylli ka rikthyer në ekip Jan Palokajn.
Bora është e shtata në tabelë me 4 fitore e 10 humbje kurse Ylli renditet i pesti me 7 fitore e po aq disfata.
Kjo xhiro, vazhdon edhe të enjten me dy ndeshjet tjera: Vëllaznimi – Peja dhe Proton Cable Prizreni – Sigal Prishtina, të cilat po ashtu startojnë në orën 19:00.
