Basketbollistet e Bashkimit kanë vazhduar me formën e mirë që e kanë shfaqur këtë edicion në Ligën Unike. Ekipi nga Prizreni, ka regjistruar edhe fitoren e gjashtë në po aq ndeshje të luajtura në këtë garë mes skuadrave nga Kosova dhe Shqipëria. Kampioni në fuqi i Kosovës, të martën mbrëma triumfoi në Vlorë ndaj skuadrës së Flamurtarit me rezultatin 78:67. Me këtë fitore, Bashkimi është forcuar në krye të tabelës me 12 pikë, katër më shumë se Flamurtari kur kanë mbetur edhe katër xhiro deri në fund të stinorit të rregullt. Në fakt, Bashkimi është ekipi i vetëm që ende nuk di për humbje në Ligën Unike. Amerikanet Sarah Mgbeike dhe Adrienne Godbold ishin më të dalluarat te Bashkimi. Mgbeike pati 21 pikë e 9 kërcime, ndërsa Godbold shtoi 23 pikë për triumfin e Bashkimit. Krahas Bashkimit, fitore në kuadër të kësaj xhiroje të Ligës Unike, kanë shënuar edhe dy skuadrat tjera kosovare, Prishtina e Penza. Prishtina në kryeqytet triumfoi ndaj Partizanit të Tiranës me shifrat 81:65. Asianne Johnson me 25 pikë dhe Jade Ëilliams me 20 pikë e 9 kërcime ishin më efikaset te Prishtina që është e dyta në tabelë me 11 pikë të mbledhura, katër më shumë se Partizani që zë vendin e fundit. Ndërkohë, skuadra e Penzës në Gjakovë ka triumfuar kundër Tiranës me shifrat 89:68. Për Penzën, kjo është fitorja e dytë këtë edicion në Ligën Unike derisa Tirana regjistroi humbjen e katërt dhe të dyja ekipet kanë tubuar nga tetë pikë pas gjashtë ndeshjeve të luajtura. Tasharra Jones me 23 pikë të shënuara e 9 kërcime ishte lojtarja më e dalluar te skuadra e Penzës.
