Kryetari i Kuvendit të Kosovës, Dimal Basha, ka shprehur keqardhje që në seancën e Kuvendit, javën e kaluar nuk u miratuan disa pika të rendit të ditës, ku në mesin e tyre ka qenë ligji për buxhetin, raporti i RTK-së dhe disa marrëveshje ndërkombëtare.
Ai kështu është shprehur në takim me të ngarkuarën me punë të ambasadës Amerikane në Kosovë, Anu Prattipati, me të cilën diskutoi për zhvillimet e fundit në vend dhe aktualitetin politik.
“Kryetari i Kuvendit shprehu keqardhjen që nuk u votuan disa prej çështjeve të rëndësishme në Kuvend, përfshirë marrëveshjet ndërkombëtare, buxhetet e komunave, ligjin e buxhetit, si dhe raportin e RTK-së që do të mundësonte zgjidhjen e çështjes së pagave për punëtorët”, tha Basha, thuhet në komunikatën e Kuvendit.
Një pjesë e bisedës u përqendrua te procesi zgjedhor në vend, rëndësia e zgjedhjeve të lira dhe të ndershme, si dhe respekti mes subjekteve politike.
“Kosova është dëshmuar se organizon procese zgjedhore të rregullta, ndërsa qytetarët tanë kanë treguar vazhdimisht kulturë të lartë demokratike”, theksoi Basha.
Kryeparlamentari Basha gjithashtu shprehu mirënjohjen për mbështetjen e vazhdueshme të Shteteve të Bashkuara, aleatin tonë të çmuar dhe siç e cilësoi ai, modelin e përhershëm për vlerat dhe standardet demokratike./teve1.info/
