Ministri në detyrë i Infrastrukturës dhe Transportit, Dimal Basha ka njoftuar se ministria ka pezulluar nga detyra zyrtarët ndaj të cilëve Prokuroria Speciale ka ngritur aktakuzë për keqpërdorim të pozitës apo autoritetit zyrtar.
Sipas Bashës, rasti lidhet me periudhën 2017–2019 dhe me një kontratë për mirëmbajtjen e urave në rrugët nacionale dhe regjionale.
“Ministria e Infrastrukturës dhe Transportit ka pezulluar nga detyra zyrtarët ndaj të cilëve Prokuroria Speciale ka ngritur aktakuzë për keqpërdorim të pozitës apo autoritetit zyrtar”, ka deklaruar Basha.
Ai ka bërë të ditur se aktiviteti i prokurimit ishte iniciuar me një vlerë të parashikuar prej 500 mijë eurosh, ndërsa pagesat e realizuara, sipas aktakuzës, kanë arritur në mbi 5 milionë euro.
“Këto janë para të qytetarëve dhe përgjegjësi publike, andaj presim që drejtësia ta thotë sa më shpejt verdiktin përfundimtar dhe të mbajë përgjegjës secilin që ka abuzuar me mjetet e taksapaguesve”, është shprehur ministri në detyrë.
Basha ka theksuar se askush nuk mund të jetë mbi ligjin dhe se buxheti publik duhet të menaxhohet vetëm në përputhje me procedurat dhe rregullat në fuqi.
Ai ka shtuar se Ministria e Infrastrukturës dhe Transportit do të ofrojë bashkëpunim të plotë me organet e drejtësisë për çdo informacion lidhur me rastin.
“Ne do të punojmë fort që ta forcojmë kontrollin, mbikëqyrjen dhe llogaridhënien në çdo nivel të Ministrisë dhe çdo dyshim serioz për keqpërdorim do të trajtohet me përgjegjësinë më të lartë institucionale”, ka deklaruar Basha./teve1.info/
