E para e shtetit, Vjosa Osmani, sot priti në takim kryetarin e Kuvendit, Dimal Basha.
Në këtë takim, krerët e shtetit diskutuan për konstituimin e Kuvendit të Kosovës.
Nga Presidenca treguan se ekipi ligjor ka filluar një analizë për këtë proces.
“Në këtë takim, Kryetari Basha e ka prezantuar qëndrimin e tij lidhur me konstituimin e Kuvendit të Republikës së Kosovës. Në anën tjetër, Presidentja Osmani e ka informuar kryetarin Basha se ekipi ligjor i Presidencës është duke bërë analizën lidhur me procesin e konstituimit të Kuvendit të Kosovës. Presidentja ka potencuar se, sikurse gjithmonë, do të veprojë në përputhje të plotë me Kushtetutën dhe ligjet në fuqi, duke garantuar stabilitetin institucional dhe respektimin e vullnetit të qytetarëve të Kosovës”, thuhet nga Presidenca.
E në komunikatën e Kuvendit të Kosovës u tha se u diskutua edhe për formimin e Qeverisë.
“Kryetari Basha dhe presidentja Osmani kanë biseduar për domosdoshmërinë që proceset kushtetuese dhe ligjore të ecin me dinamikën e paraparë kohore, në mënyrë që të mundësohet zgjedhja sa më e shpejtë e qeverisë së re të vendit, si përgjegjësi e Kuvendit të Republikës së Kosovës”, thuhet nga Kuvendi i Kosovës
Por ky njoftim u fshi pas publikimit, pasi sipas kryetarit Basha komunikata e Kuvendit u lëshua pa miratimin e tij.
Ai tha se ka qenë një gabim teknik nga ana e stafit.
“Stafi ka bërë një gabim dhe e ka lëshu një komunikatë pa miratimin tim. Aty nuk ka pasë diskutim tjetër përveç njoftimit që e kam bërë. Prandaj është gabim teknik që është bërë prej stafit tim”, tha Basha.
Takimi i sotëm me Presidenten, ishte edhe takimi i parë zyrtar i kuvendit të zgjedhur të Kuvendit të Kosovës, Dimal Bashës.
