Kryetari i Kuvendit të Kosovës, Dimal Basha, ka përkujtuar 35-vjetorin e miratimit të Kushtetutës së Kaçanikut, të cilën e ka cilësuar si gurthemel të shtetësisë së Kosovës.
Ai tha se më 7 shtator 1990, në Shtëpinë e Kulturës në Kaçanik, delegatët e Kuvendit të Kosovës, në kushte represioni por me guxim dhe vizion për liri e pavarësi, shpallën për herë të parë Kosovën Republikë.
“Kushtetuta e Kaçanikut, e mbështetur në traditën liridashëse të kombit shqiptar, në parimet e demokracisë e barazisë dhe në të drejtën për vetëvendosje, shpalli qartë se territori i Kosovës është unik, i pandashëm e i patjetërsueshëm. Ky dokument i ktheu parullat e demonstratave të vitit 1981 ‘Kosova Republikë’ në realitet politik, duke i paraprirë referendumit të vitit 1991 dhe lëvizjes paqësore, që u përcoll më pas me luftën e lavdishme çlirimtare të UÇK-së e që u kurorëzua me Pavarësinë më 17 shkurt 2008”, ka shkruar Basha në Facebook.
Ai ka kujtuar profesorët Gazmend Zajmi, Kurtesh Saliu, Ejup Statovci, Ismet Salihu, Fatmir Fehmiu, Halit Muharremi e Riza Smaka, të cilët përgatitën tekstin e plotë të Kushtetutës, si dhe delegatët që me guxim morën pjesë në këtë akt historik.
“Me nderim e respekt, kujtojmë profesorët, delegatët dhe qytetarët e Kaçanikut që bënë të mundur këtë akt historik. Kushtetuta e Kaçanikut mbetet testament i gjallë i unitetit, përkushtimit dhe vendosmërisë sonë kolektive për liri, barazi dhe shtet të pavarur e sovran. Ajo na rikujton se pavarësia është arritur me sakrificë dhe mbrojtja e saj është përgjegjësi e përhershme për ne”, ka përfunduar ai.
