Sy qytetarë të nacionalitetit serb, njëri me shtetësi të Kosovës e tjetri të Serbisë, janë arrestuar mbrëmjen e së premtes në fshatin Joshanicë të Leposaviqit nga njësia e ndërhyrjes së shpejtë e Policisë Kufitare, raporton teve1.info
Sipas komunikatës së Policisë, në veturën me targa të Kosovës, të cilën e drejtonte i dyshuari me inicialet M.M., i lindur më 2004, janë gjetur dhe konfiskuar 4 kilogramë e 240 gramë lëndë narkotike, të dyshuar të llojit marihuanë.
Ndërsa, i dyshuari tjetër me iniciale N.J. i lindur në vitin 2002, shtetas i Serbisë, dyshohet se ishte në përcjellje të drejtuesit të veturës që i transportonte lëndët narkotike.
“Zyrtarë policorë nga Njësia e Ndërhyrjes së Shpejtë e Policisë Kufitare, të premten në mbrëmje, rreth orës 20:50, gjatë realizmit të detyrave, në fshatin Joshanicë të Leposavict, kanë ndaluar për kontroll dy vetura. Veturat drejtoheshin njëra nga një mashkull serb-kosovar dhe tjetra nga një serb i Serbisë.
Në veturën me targa kosovare, që drejtohej nga M.M., viti i lindjes 2004, mashkull kosovar, janë gjetur dhe konfiskuar katër paketime që dyshohet të jenë me lëndë narkotike-marihuanë. Sasia e substancës së konfiskuar 4240 gramë.
Drejtuesi i veturës tjetër N.J., viti i lindjes 2002, mashkull shtetasi i Serbisë, dyshohet se ka qenë në përcjellje dhe bashkëpunim me drejtuesin e veturës që kryente transportin e lëndëve narkotike”, thuhet në komunikatë.
Për rastin janë njoftuar Njësia e Drejtorisë për Hetimin e Trafikimit me Narkotik-Mitrovicë Veri dhe prokurori, me akt-vendim të të cilit të dyshuarit janë dërguar në mbajtje deri në 48 orë.
