Barrikadat vendoseshin në çdo rrugë në katër komunat veriore para tri viteve.
Kjo vinte pas vendimeve dhe aksioneve që merrte shteti i Kosovës.
E për këto bllokada që pamundësonin lëvizjen e lirë të qytetarëve, tash Prokuroria Speciale ka nisur hetim ndaj kryetarit dhe anëtarëve të partisë më të madhe serbe në vend, Listës Serbe.
Në prokurori të premten u paraqit deputeti i këtij subjekti, Igor Simiq.
Pasi kreu intervistimin, ai tha që në protestat e vitit 2022 në veri, kanë bërë thirrje për qetësi dhe paqe teksa theksoi e cilësoi procesin e hetimeve si jo të drejtë.
“Ne hyjmë në këtë proces dhe e bëjmë këtë deklaratë jo sepse besoj se procesi është i drejtë ose se bazohet në ndonjë provë për ndonjë faj të ndonjërit prej rreth dyzet serbëve që janë marrë në pyetje, por sepse e dimë se jemi të pafajshëm, e dimë se nuk kemi bërë asgjë të paligjshme dhe e dimë se si përfaqësues politikë vendi ynë ishte me popullin tonë atëherë dhe sot, dhe do të jetë nesër. Paraburgimi dhe arrestimi dhe gjithçka tjetër që ata bënë në periudhën e mëparshme ndaj dhjetëra serbëve”, tha Simiq.
E, Prokuroria Speciale Kosovës në një përgjigje me shkrim, ka bërë të ditur se Igor Simiç është intervistuar në cilësinë e të dyshuarit.
“Prokuroria Speciale e Republikës së Kosovës, e ka intervistuar të premten z.Igor Simic në cilësinë e të dyshuarit, në kuadër të hetimeve që është duke i zhvilluar në rastin e vendosjes së barrikadave në katër komunat veriore në vitin 2022. Z. Simic është përgjigjur në secilën pyetje të Prokurorisë Speciale”, thuhet nga përgjigja e zëdhënëses së Prokurorisë Speciale, Nora Luta.
Prokuroria Speciale, po heton edhe kryetarin aktual të Listës Serbe, Zllatan Ellek, ish-kryetarin Goran Rakiq, dhe deputetin Sllavko Simiç, bashkë me më shumë se 40 persona tjerë për veprat penale: pengim i personit zyrtar në kryerjen e detyrave zyrtare, thirrje për rezistencë dhe bashkimi për veprimtari kundër kushtetuese.
Nga Prokuroria Speciale, kanë konfirmuar për Tëvë1 se intervistimin e ka përfunduar edhe Sllavko Simiç, ndërkaq janë në pritje të intervistimit për Zlatan Elek dhe Goran Rakiq.
“Sa i përket z. Slavko Simic, mund të konfirmojmë se intervistimi i tij tashmë ka përfunduar, ndërsa për z.Elek është shtyrë për një datë tjetër me kërkesë të mbrojtjes së tij për arsye shëndetësore. Për arsye shëndetësore nuk është paraqitur në seancën e parë z. Goran Rakiç, për çka ka dorëzuar raport mjekësor, ndërsa për seancën e datës 18 qershor deri tash nuk ka paraqitur arsyetim për mosprezencën e tij. Prokuroria Speciale do ta caktoj një datë tjetër sa i përket intervistimit të z. Rakic”, tha Luta.
Për vendosjen e barrikadave, Prokuroria Speciale e Kosovës ka lëshuar fletarrestim ndaj Radoiçiqit dhe 10 serbëve të tjerë.
Për këto ftesa nga ana e Prokurorisë Speciale, reagim gjatë ditës ka pas edhe nga ministri i Punëve të Jashtme i Serbisë, Marki Gjuriq i cili e ka quajtur procesin si “ dëbim për popullin serb” nga Kosova.
