Rrugë të pakalueshme.
Barrikada të vendosura në disa lokacione.
Këto janë pamjet e vitit 2022 në katër komunat veriore të Kosovës.
Të gjitha këto u vendosën në atë kohë nga serbët lokal në shenjë proteste, pas arrestimit të ish-policit serb, Dejan Pantiq.
Për gjithë këto veprime, këtë të mërkurë Prokuroria Speciale e Kosovës ngriti aktakuzë ndaj gjashtë personave.
“Të pandehurit D.M., D.D., M.R., N.J., N.O., dhe S.V., akuzohen se nga 10.12.2022 deri më 29.12.2022, në komunat veriore të Republikës së Kosovës, duke vepruar në bashkëkryerje dhe përmes përdorimit të forcës dhe dhunës, kanë penguar institucionet e Republikës së Kosovës në vendosjen e rendit kushtetues, ushtrimin e autoritetit shtetëror dhe kryerjen e detyrave zyrtare në këto komuna”, thuhet nga Prokuroria Speciale.
Para katër vitesh, siç thuhet në aktakuzë, serbët kishin tentuar të sulmojnë edhe zyrtarët policorë.
“Sipas aktakuzës, ata kanë bllokuar rrugët kryesore me mjete të rënda, përfshirë kamion të mbushur me zhavorr, ekskavatorë, autoambulanca, autobusë dhe automjete të tjera. Po ashtu, nga veprimet e tyre rezulton se, në rast të ndërhyrjes së Policisë së Kosovës për largimin e barrikadave dhe rivendosjen e lirisë së lëvizjes, pjesëtarët e grupit kanë qenë të gatshëm t’i sulmonin zyrtarët policorë me mjetet që kishin në dispozicion”, thuhet tutje.
Në anën tjetër, ndaj 11 personave të tjerë, hetimet janë pezulluar përkohësisht, pasi ende janë të paarritshëm për organet e ndjekjes.
Në mesin e tyre, siç mëson televizioni, është edhe kryeterroristi i sulmit në Banjskë, Milan Radoiçiq.
