Shefi i Misionit të EULEX-it në Kosovë, Giovanni Pietro Barbano, ka thënë se institucionet duhet të sigurohen që baza ligjore që ka krijuar Kosova për llogaridhënie për keqtrajtim nga Policia në rastet ku ka pretendime të zbatohet në praktikë.
Sipas tij, kjo e rritë besueshmërinë në Policinë e Kosovës.
“Lidhur me gjetjet e monitorimit tematik, EULEX-i vlerëson se Kosova ka krijuar një kornizë gjithëpërfshirëse ligjore dhe institucionale për të siguruar llogaridhënien për keqtrajtimin nga Policia e Kosovës. Megjithatë, ajo duhet të sigurojë që kjo kornizë të zbatohet plotësisht dhe në praktikë në të gjitha rastet kur ngrihet ndonjë pretendim i argumentueshëm, pavarësisht nga grada ose njësia zyrtarit të policisë. Kjo gjithashtu ka rëndësi të madhe për të ruajtjen e besimit publik në Policinë e Kosovës në një nivel të lartë”, ka thënë ai, me rastin e publikimit të raportit të Monitorimit të Drejtësisë për vitin 2025.
Barbano, ka folur edhe për rastet e ndjekjes penale dhe gjykimet për krime lufte, ku ka thënë se kanë parë aktivitet në rritje, por sipas tij, autoritet duhet të respektojnë plotësisht standardet e gjykimit të drejtë.
“Sa i përket hetimit, ndjekjes penale dhe gjykimit të krimeve sipas të drejtës ndërkombëtare, veçanërisht krimeve të luftës, EULEX-i vuri në dukje aktivitetet të vazhdueshëm në rritje në të gjitha fazat. Megjithatë, ndërsa bëhen përpjekje për të ofruar drejtësi për viktimat; autoritetet duhet të respektojnë plotësisht standardet e gjykimit të drejtë: në këtë kontekst, Misioni identifikoi disa fusha shqetësuese”, tha ai.
