Peja ka barazuar në 1:1 serinë çerekfinale të fazës “play-off” ndaj Golden Eagle Yllit në Superligën e Kosovës në basketboll.
Pas humbjes në Suharekë javën e shkuar nga Ylli në ndeshjen e parë, Peja ka triumfuar në duelin e dytë që e luajti në shtëpi.
Të mërkurën mbrëma, në palestrën “Karagaçi”, Peja triumfoi me shifrat 99:81.
Tani, seria zhvendoset në Suharekë, me ndeshjen e tretë që luhet në fundjavë, ku edhe përcaktohet skuadra gjysmëfinaliste.
Skuadra që realizon dy fitore në çerekfinale, kualifikohet në serinë gjysmëfinale ku e pret Trepça.
Në duelin e luajtur në Pejë, vendësit ishin më të mirë pasi fituan tre çerekë dhe humbën vetëm një për fitoren e thellë.
Arti Hajdari me 16 pikë, 3 kërcime e 5 asistime ishte më efikasi te Peja kurse te Ylli u veçua Tyreek Smith me 18 pikë e 7 kërcime.
