Profesori universitar, Mazllum Baraliu ka vlerësuar se ish – opozita po synon dërgimin e Vetëvendosjes në opozitë.
Ai ka thënë se këto parti kanë filluar të ndryshojnë strategji, por sipas tij, LVV mbetet ende me ndikim dhe do të dalë fituese në zgjedhjet e 28 dhjetorit.
“Opozita ka bërë hapa konkret që të ndërrojnë strategji dhe taktikë, siç ka bërë partia e dytë duke ndërruar edhe udhëheqësin. Ka synim që të fitohet sa më shumë vota, por është shumë e vështirë në këto momente, pasi Vetëvendosje ka ende ndikim. Mendoj që Vetëvendosje do të dal e para, se sa, mund të dal më pak. Sigurisht qytetari që është i dëshpëruar me LVV-në, por edhe me partitë tjera. Ata po përgatiten me qëllim që të bëjnë sa më shumë vota dhe ta bëjnë një qeverisje potencialisht të opozitës për të vazhduar kursin për të lënë Vetëvendosjen në opozitë”, ka thënë Baraliu në emisionin “InfoNata” në Tëvë1.
