Autore: Adea Mustafaj
Të lehura qensh e bërtima fëmijësh të frikësuar.
Me të tillë realitet po përballen banorët e lagjes së Doktorëve në Mitrovicë të Veriut.
E për këtë shprehen të shqetësuar, teksa rrëfejnë rastet që u kanë ndodhur.
“Unë e kom pas me vajzën rastin në tetor. Kur ka shku në shkollë, e kanë sulmu disa qenë këtu të lagjës…Shkollë kur po shkon pak e rrezikume është. Mu më duhet kaniherë me e përcjell” , thotë Feliza Preveza, banore e lagjes.
Banorët thonë se ka edhe të atilla raste që qytetarë të tjera lagjeve, lëshojnë qentë në rrugë.
“Ka shumë, po ka që banorë tjerë të tjera lagjeve. Ka ndodh që unë këtu në lagje e kom pa që e ka lëshu prej veture qenin këtu. Do të thotë nuk është fajtore vetëm Komuna, se këtu bin edhe prej lagjeve tjera” , thotë ajo.
Të njëjtin hall ka edhe Xhyljeta Arifi.
“Vajza e motrës, jeton menjëherë mbrapa kësaj banese. Unë jetoj këtu. Duke ardh tek unë e kanë sulmu qentë. Nuk është rasti i parë. Djalin ma kanë sulmu. Djali ka traumë. Gjithë fëmijët e kësaj lagjes kanë traumë prej qenëve endacakë”, thotë Arifi.
Nga opozita thanë për Tëvë1, se për rastet me qentë endacakë, në të kaluarën është hapur si temë ne Kuvend komunal.
“Duhet të mirren sa më shpejtë organet kompetente me këtë temë që të gjejnë zgjidhje afatgjate dhe të eleminojnë rrezikun nga këta qenë endacakë. Për këtë temë është dashtë të mirret më shumë ekzekutivi sepse është në kompetencat e tyre dhe për më shumë informata mund t’iu drejtoheni ekzekutivit sepse në të kaluarën është hap kjo temë në Kuvend”, tha Flutura Hamza –Azemi, asmblesite e PDK-së.
Në anën tjetër, zëvendëskryesuesi komunal i Mitrovicës së Veriut, Skënder Sadiku tha se janë të vetëdijshëm për raste të tilla.
“Fatkeqsisht po, nuk është rasti i fundit. Shpresoj që të jetë rasti i fundit…..Komuna si komunë e ka Inspektoriati. Besoj që edhe Inspektoriati do të involvohet në këtë. Ekziston përtej kësaj edhe një strategji nacionale e cila është nga Qeveria e Republikës së Kosovës për trajtimin e qenëve. Është edhe një marrëveshje e Komunës me Qeverinë Zvicerane për trajtimin e kafshëve”, ka thënë Sadiku.
Në këtë lagje, së fundmi një fëmijë është sulmuar nga qentë endacakë para disa ditësh, por që prindërit nuk kanë pranuar të flasin para kamerës.
