Shërbimet bankare janë të limituara.
Kjo pasi brenda Bankës Komerciale në Mitrovicë të Veriut, nuk ka punonjës.
Aty në funksion është vetëm aparati për tërheqjen e parave.
Sipas burimeve të televizionit, punëtorët e saj gjenden në Serbi.
Ky filial bankar funksionon sipas ligjeve të Serbisë. E që e njëjta të punojë sipas ligjeve të Kosovës, kryesuesi i Kuvendit Komunal të Mitrovicës së veriut, Nexhat Ugljanin bën të ditur se pritet që të ketë një marrëveshje mes Bankës Komerciale në veri dhe Bankës Qendrore të Kosovës.
“Sipas marrëveshjes do të arrihet marrëveshja që Banka Komerciale si NLB që po funksionon në Kosovë por NLB edhe në Serbi, nën ombrellë është Banka Komerciale do të vjen deri te marrëveshja do të kryhen shërbimet për shumicën serbe sepse siç thash shërbimet ju siç e keni parë po kryhen përmes aparaturës për pare të Republikës së Serbisë…. po kryejnë obligimet për pensionet, rrogat që nuk janë në sistem të Kosovës”, tha ai për Tëvë1.
Kurse qytetarët serbë dhe ata shqiptarë, janë të një mendimi se në pjesën veriore, duhet gjithçka të punojë sipas ligjeve të Kosovës.
“Çfarë të them, le të bëhet si të bëhet, dashtë Zoti të jetë gjithçka si duhet”, u shpreh një qytetar.
Ndërsa, një tjetër u shpreh se “çka të ka të Serbisë këtu veç i bën dëm Kosovës, çka t’ka”.
“Çdo organizatë bankë apo çfarëdo tjetër në pjesën veriore, e cila i pranon rregullat e Republikës së Kosovës, ajo nëse dëshiron të integrohet ajo duhet të punojë sipas rregullave ligjit të Kosovës, mendoj se nuk ka asgjë të keqe nëse i pranojnë rregullat ashtu si i japin bankat sidomos nga Banka Qendrore”, tha një qytetar tjetër.
E për detaje më shumë rreth një marrëveshjeje të Bankës Komerciale në veri dhe Bankës Qendrore të Kosovës, Tëvë1 ka dërguar pyetje në BQK, por tash e një javë nuk ka pranuar përgjigje.
Kronikë e realizuar nga gazetari, Venhar Isufi.
