Banka Botërore ka miratuar një grant prej 146 milionë dollarësh për të ndihmuar rikuperimin e sektorit të energjisë elektrike në Siri, një vend që ka pësuar dëme të mëdha infrastrukturore gjatë viteve të konfliktit të armatosur.
Sipas një deklarate zyrtare, Projekti i Emergjencës për Energjinë Elektrike në Siri (SEEP) do të fokusohet në rehabilitimin e linjave të transmetimit dhe nënstacioneve të transformatorëve të dëmtuar, si dhe do të ofrojë asistencë teknike për forcimin e kapaciteteve institucionale dhe zhvillimin e mëtejshëm të sektorit energjetik.
Ndër vite, infrastruktura energjetike e Sirisë është dëmtuar rëndë, duke bërë që furnizimi me energji elektrike të jetë i kufizuar – në shumë zona, vetëm për disa orë në ditë.
Jean-Christophe Carret, drejtor i divizionit të Lindjes së Mesme në Bankën Botërore, theksoi rëndësinë e këtij projekti:
“Në mesin e prioriteteve të rindërtimit të Sirisë, rehabilitimi i sektorit të energjisë është një investim jetik. Ai jo vetëm që përmirëson kushtet e jetesës së qytetarëve, por edhe mbështet kthimin e refugjatëve, rifillimin e shërbimeve të tjera jetike si furnizimi me ujë dhe kujdesi shëndetësor, si dhe nxit rimëkëmbjen ekonomike.”
Carret shtoi se ky projekt shënon fillimin e një angazhimi më të gjerë të Bankës Botërore në mbështetje të rimëkëmbjes dhe zhvillimit të Sirisë.
Edhe ministri sirian i Financave, Yisr Barnieh, vlerësoi iniciativën, duke e cilësuar energjinë elektrike si një element themelor për zhvillimin ekonomik dhe përmirësimin e jetesës së popullatës, ka shkruar Anadoly.
“Ky është projekti i parë i Bankës Botërore në Siri pas gati katër dekadash. Shpresojmë që të hapë rrugën për një program gjithëpërfshirës dhe të strukturuar që do të ndihmojë vendin tonë në ndërtimin e një të ardhmeje më të qëndrueshme dhe të begatë.”
Në një zhvillim paralel, muajin e kaluar Siria nënshkroi një marrëveshje me një konsorcium ndërkombëtar, i cili përfshin kompani nga Turqia, Shtetet e Bashkuara dhe Katari, për ndërtimin e centraleve të reja energjetike në vend – një tjetër hap drejt rindërtimit të rrjetit energjetik dhe stabilizimit të jetës civile.
