Mesfushori Nazmi Gripshi, mund të jetë futbollisti i radhës që do të largohet nga skuadra e Ballkanit të Suharekës.
Ai ka gjasa që karrierën ta vazhdoj në Poloni, pasi interesim për shërbimet e tij ka shprehur skuadra e Cracovias.
Madje, mediumet polake kanë bërë të ditur se Cracovia tashmë i ka bërë Ballkanit edhe ofertë zyrtare për Gripshin. Thuhet se Cracovia ka ofruar 400 mijë euro për 26-vjeçarin dhe marrëveshja mes klubeve mund të finalizohet brenda 48 orëve.
Gripshi prej vitit 2020 është pjesë e Ballkanit, ekip me të cilin ka fituar dy tituj kampioni të Kosovës dhe një Superkupë. Po ashtu, Gripshi ka luajtur me Ballkanin edhe në fazën e grupeve të Ligës së Konferencës dhe me ekipin kosovar ka kontratë deri vitin 2025.
Këtë edicion, ai ka shënuar 8 gola në Superligën e Kosovës në futboll, ndërsa mund të bëhet futbollisti i dytë i Ballkanit që zhvendoset këtë muaj në Poloni pas Qëndrim Zybës. Zyba ditë më parë u huazua te skuadra e Legia Varshavës.
