Ballkani ka publikuar formacionin zyrtar për ndeshjen e rundit të parë kualifikues për Ligën e Kampionëve, kundër Santa Colonas, takim i cili zhvillohet në Andorrë dhe nis në orën 20:00.
Trajneri Ilir Daja ka vendosur për 11-shen startuese me shumë ndryshime, i detyruar nga largimet e shumta nga kampioni i Kosovës gjatë kësaj vere.
Në portë është Enea Koliqi. Në mbrojtje luan mbrojtësi i djathtë i blerë nga Vllaznia e Shkodrës, Geralb Smajli. Qendra formohet nga Gentrit Halili e i kthyeri nga Drita, Astrit Thaqi. Në të majtë luan Arbër Potoku, që është edhe kapiten i skuadrës pas largimit të Edvin Kuq e Armend Thaqit.
Në mesfushë, bashkë me Lindon Emërllahun luan edhe Marsel Ismajlgeci e braziliani Queven. Sulmi përbëhet nga Bernard Karrica, Bleart Tolaj e Walid Hamidi.
Për Ballkanin, kjo është hera e tretë rresht që luan në këtë raund kualifikues të Ligës së Kampionëve, të cilin synon ta kaloj për herë të parë.
Ndeshja e kthimit luhet javën e ardhshme në Kosovë, saktësisht në stadiumin “Zahir Pajaziti” në Podujevë.
