Kampioni i Kosovës në futboll, Ballkani është eliminuar nga garat evropiane këtë sezon në raundet kualifikuese.
Rrugëtimi i Ballkanit në Evropë, u ndal të enjten mbrëma në Irlandë të Veriut nga skuadra e Larnes.
Larne e eliminoi Ballkanin në raundin e tretë kualifikues të Ligës së Konferencës pas penalltive.
Pas fitores 1:0 javën e shkuar në Prishtinë, Larne fitoi me penallti në ndeshjen e kthimit me rezultatin 4:1.
Koha e rregullt e takimit përfundoi 1:0 për Ballkanin, ndërsa fituesi nuk u përcaktua as në dy vazhdimet nga 15-të minuta. Kështu që, gjithçka u vendos me penallti pasi rezultati i përgjithshëm pas dy ndeshjeve ishte 1:1.
Golin në kohën e rregullt për Ballkanin e shënoi Walid Hamidi (45’) nga penalltia.
Megjithatë, Hamidi dështoi nga pika e bardhë në serinë e penalltive ku edhe u vendos ekipi që avancoi tutje.
Krahas Hamidit, penalltinë për Ballkanin e humbi edhe Engjëll Ajazaj kurse te Larne ishin të gjithë të saktë nga pika e bardhë.
Pas dy paraqitjeve në fazën e grupeve në dy sezonet paraprake, këtë sezon Ballkani u ndal në raundin e tretë kualifikues të Ligës së Konferencës.
Rrugëtimin evropian e nisi në raundin e parë kualifikues të Ligës së Kampionëve por u eliminua për të vazhduar në Ligën e Konferencës, ku nuk arriti ta prek fazën play-off.
Ekipi i Dritës është i vetmi nga Kosova që është ende në garë dhe në play-offin e Ligës së Konferencës do të përballet me Legian e Varshavës. Para Ballkanit, janë eliminuar edhe Llapi e Malisheva.
